1Ch 23 | NdeIBE | STEP | Kwathi uDavida esemdala eseluphele, wabeka uSolomoni indodana yakhe ukuba abe yinkosi ko-Israyeli.

1 Chronicles 23

AbaLevi

1 Kwathi uDavida esemdala eseluphele, wabeka uSolomoni indodana yakhe ukuba abe yinkosi ko-Israyeli. 2 Wasehlanganisa bonke abakhokheli bako-Israyeli, labaphristi kanye labaLevi. 3 AbaLevi abaleminyaka esukela kwengamatshumi amathathu kusiya phezulu babalwa, inani lamadoda laba yizinkulungwane ezingamatshumi amathathu laficamibili.

4 UDavida wasesithi: “Phakathi kwalaba, abayizinkulungwane ezingamatshumi amabili lane bazakhangela ukuqhutshwa komsebenzi wethempeli likaJehova kuthi abayizinkulungwane eziyisithupha bazakuba yizikhulu labahluleli. 5 Abayizinkulungwane ezine bazakuba ngabalindi bamasango kuthi abayizinkulungwane ezine badumise uJehova ngamachacho lezigubhu engizigcinele lowomsebenzi.”

6 UDavida wehlukanisa abaLevi ngamaxuku kusiya ngamadodana kaLevi: uGeshoni, loKhohathi kanye loMerari.

AbakaGeshoni

7 Exukwini labakaGeshoni yilaba: uLadani loShimeyi.

8 Amadodana kaLadani yila: nguJehiyeli owokuqala, loZethami kanye loJoweli, bonke bebathathu.

9 Amadodana kaShimeyi yila: nguShelomothi, loHaziyeli kanye loHorani, bonke bebathathu. Laba babeyizinhloko zezindlu zenzalo kaLadani.

10 Lamadodana kaShimeyi yila: nguJahathi, loZiza, loJewushi kanye loBheriya. Laba kwakungamadodana kaShimeyi, bonke babebane.

11 UJahathi engowakuqala loZiza engowesibili, kodwa uJewushi loBheriya abazange babe lamadodana amanengi, ngakho babalwa njengemuli yinye bahle baphiwa umsebenzi bendawonye.

AmaKhohathi:

12 Amadodana kaKhohathi yila: ngu-Amramu, lo-Izihari, loHebhroni kanye lo-Uziyeli, bonke babebane.

13 Amadodana ka-Amramu yila: ngu-Aroni loMosi. U-Aroni wehlukaniselwa ukunikela izinto ezingcwele kakhulu kuNkulunkulu, ukuze yena lamadodana akhe batshise impepha phambi kukaJehova lokumkhonza lokubusisa ngebizo lakhe kuze kube nininini. 14 Amadodana kaMosi inceku kaNkulunkulu abalwa ndawonye labesizwana sikaLevi.

15 Amadodana kaMosi yila: nguGeshomu lo-Eliyezeri.

16 Abosendo lukaGeshomu: nguShubayeli engowakuqala.

17 Abosendo luka-Eliyezeri: nguRehabiya engowakuqala. U-Eliyezeri kazange abe lamanye amadodana kodwa amadodana kaRehabiya ayemanengi kakhulu.

18 Amadodana ka-Izihari yila: nguShelomithi engowokuqala.

19 Amadodana kaHebhroni yila: nguJeriya engowokuqala, lo-Amariya engowesibili, loJahaziyeli engowesithathu kanye loJekhameyamu owesine.

20 Amadodana ka-Uziyeli yila: nguMikha engowakuqala lo-Ishiya owesibili.

AmaMerari

21 Amadodana kaMerari yila: nguMahili loMushiya. Amadodana kaMahili yila: ngu-Eleyazari loKhishi.

22 U-Eliyazari wafa engelamadodana: wayelamadodakazi wodwa. Amadodakazi endela kubafowabo, amadodana kaKhishi.

23 Amadodana kaMushi yila: nguMahili, lo-Ederi kanye loJerimothi, bonke bebathathu.

24 Laba kwakungabosendo lukaLevi ngezindlu zabo, abayizinhloko zezindlu njengokulotshwa kwamabizo lokubalwa kwabo ngamunye, okutsho ukuthi, abasebenzayo abaleminyaka engamatshumi amabili kusiya phezulu ababesebenza ethempelini likaJehova.

25 Ngoba uDavida wathi: “Njengoba uJehova, uNkulunkulu ka-Israyeli, enike abantu bakhe ukuthula lokuthi bazahlala eJerusalema kuze kube nininini, 26 abaLevi akusafanele bathwale ithabanikeli loba kuyini okusetshenziswa ezinkonzweni zalo.”

27 Njengeziyalezelo zikaDavida zokucina, abaLevi babalwa kusukela kwabaleminyaka engamatshumi amabili kusiya phezulu.

28 Umsebenzi wabaLevi wawungowokuncedisa inzalo ka-Aroni emsebenzini wethempeli likaJehova: ukugcina amaguma akhona; izindlu ezisemaceleni, ukuhlambulula zonke izinto ezingcwele lokwenza yonke imisebenzi endlini kaNkulunkulu.

29 Babephethe umsebenzi wesinkwa sokwahlukanisela uNkulunkulu ethaleni, ifulawa yomnikelo wamabele, lesinkwa esingelamvubelo, ukuxuba lokupheka isinkwa, lezilinganiso zonke zezisindo lobukhulu bakhona. 30 Njalo babemele beme ngezinyawo ekuseni nsuku zonke ukubonga lokudumisa uJehova. Kwakufanele benze njalo lantambama,

31 lanxa kunikelwa kuJehova ngeSabatha langokuthwasa kweNyanga iminikelo yomhlatshelo wokutshiswa, lakuwo wonke amadili amisiweyo. Babefanele bamsebenzele uJehova ngazo zonke izikhathi ngenani elilingeneyo langendlela ababeyimiselwe.

32 Ngakho abaLevi bawenza umsebenzi wabo weThenteni lokuHlanganela, laseNdaweni eNgcwele, ngaphansi kwabafowabo abayisizukulwana sika-Aroni, emsebenzini wethempeli likaJehova.